Borgarafundur á Sandi: "Vit vita ov lítið um tunnilsleiðina"

Klokkan 19 í kvøld verður borgarafundur á Sandi um Suðuroyartunnilin.

Tað eru Sands kommuna og privatfólk, ið skipa fyri fundinum, sum verður á Bókasavninum á Sandi.

- Vit vita ov lítið um m.a. tunnilsleiðina hjá Suðuroyartunlinum. 

Tað sigur Poul Clementsen, bygdaráðslimur, sum er ein at stigtakarunum.

Áhugabólkur við á fundinum

Við á fundinum verður eisini áhugabólkurin fyri eini alternativari tunnilsætlan, sum hevur lagt eina aðra linjuføring fram enn hana, sum Tunnilsfelagið heldur seg til, og sum er nevnd í lógaruppskotinum, sum í løtuni er í Løgtinginum.

Tunnilsstjórin ikki við at fundinum

Teitur Samuelsen, stjóri í tunnilsfelagnum, sigur í stuttari viðmerking við útvarpið í dag, at hann heldur ikki, at tað er rætt at fara á borgarafundin, nú málið liggur í løgtinginum. 

- Vit vilja fegin í samskifti við Sands kommunu, tá ið ein avgerð er tikin um, at Suðuroyartunnilin skal gerast, sigur hann.

Triðja viðgerð av lógaruppskotinum um S-tunnil verur mánadagin komandi.