Kannast skal fyrst

Kannast skal væl og virðiliga, hvørja ávirkan ein tunnil fær á náttúruna í Skúvoy.

Og tað skal gerast, áðrenn arbeiðið byrjar.

Lítil ivi er um, at ein slík verkætlan, sama hvar hon er, fer at hava skaðiliga ávirkan á náttúruna.

Tað sigur Umhvørvisstovan um møguleikan at taka Skúvoynna við, tá Suðuroyartunnilin verður gjørdur.

Umhvørvisstovan mælir til, at ein ítøkilig og fullfíggjað umhvørvisárinsmeting verður gjørd, áðrenn  støða verður tikin til møguligan tunnil til Skúvoynna. 

Ramsaroyggj

Umhvørvisstovan minnir eisini á, at Skúvoyggin er Ramsarøki.

Skúvoy hevur serstøk náttúruvirði, serliga tá hugsað verður um sjófugl og heiðafugl.

Ein tunnil í Skúvoy er ikki útilokaður.

Men, sigur Umhvørvisstovan, ein ítøkilig og fullfíggjað umhvørvisárinsmeting av allari verkætlanini  skal gerast fyrst.

Umhvørvistovan hevur skrivað til Løgmansskrivstovuna.

Løgmaður gav løgtinginum skrivið í gjár.