Elias og Kiel rukku ikki - Jóhan og Flensburg aftur í finaluni

Elias Ellefsen á Skipagøtu skeyt trý mál og átti næstseinastu hond á seks, tá THW Kiel tapti við einum máli á Montpellier í European League-hálvfinaluni í dag.

Fraklendingarnir skoraðu til 32-31 í síðstu løtu, og týska stórfelagið tapti tískil eina evropeiska hálvfinalu annað árið á rað. 

Kiel fekk katastrofubyrjan og var aftanfyri við fimm mestsum beinanvegin, men við hjálp frá millum annað føroyska spælskiparanum kom gongd á álopsspælið hjá týskarunum, sum var á odda við einum í steðginum.

Í seinna hálvleiki gekk javnt á, men síðstu løtuna yvirhálaði Montpellier, og so kundi Ahmed Hesham avgera trý sekund fyri leiklok. Elias á Ellefsen á Skipagøtu og Kiel skulu spæla um bronsuna í morgin.

Jóhan kann vinna aftur í ár

Hin føroyingurin í hálvfinalunum kundi hinvegin fegnast um finalupláss í næststerkastu evropeisku kappingini. Jóhan á Plógv Hansen og Flensburg-Handewitt kunnu vinna European League annað árið á rað eftir sigur á Melsungen eftir umdyst.

Havnarmaðurin á høgra veingi skeyt eitt mál upp á tríggjar royndir í dramatiska dystinum, sum endaði 34-35 eftir at vanliga leiktíðin endaði við 28-28 javnleiki.