Trump er misøgdur við Putin

Amerikanski forsetin, Donald Trump, er ikki nøgdur við russiska forsetan, Vladimir Putin, eftir umfatandi álopini á Ukraina um vikuskiftið.

Álopið sunnunáttina var, sambært fleiri miðlum, sum endurgóvu ukrainskar myndugleikar, tað størsta higartil í trý ára drúgva krígnum. 

13 fólk lótu lív.

Veit ikki, hvat er hent við Putin 

- Eg eri ikki nøgdur við tað, sum Putin ger. Hann drepur nógv fólk, og eg veit ikki, hvat er hent við Putin. Eg havi kent hann leingi. Vit hava altíð verið væl, men nú sendir hann rakettir inn í býir og drepur fólk, og tað dámar mær als ikki, segði Trump í gjár við tíðindafólk á flogvøllinum í Morristown, áðrenn hann steig umborð á Air Force One-flogfarið.

Spurdur um hann umhugsar nýggj tiltøk móti Russlandi, er svarið: 'Púra vist'.