Hóttir við at strika kapitalfeløg

Skrásetingin hóttir nú við at strika kapitalfeløg, sum ikki rinda ársgjaldið rættstundis.

Skrásetingin fer í næstum at senda feløgum, sum skylda ársgjald, boð við eini freist til at fáa hesi viðurskifti í rættlag. 

Fær felagið ikki síni viðurskifti í rættlag, verður tað sent Skiftirættinum til tvingsilsavtøku.

Øll kapitalfeløg, tað eru partafeløg, smápartafeløg og íverksetarafeløg, skulu rinda ársgjald, sum er 1.200 kr. hjá partafeløgum, og 700 kr. hjá hinum.

Tá vinnufelagalógin var broytt, vóru heimildirnar hjá Skrásetingini at heita á Skiftirættin um at taka av kapitalfeløg víðkaðar. 

Avgerð hjá Skrásetingini um at senda kapitalfelag í Skiftirættin til tvingsilsavtøku kann ikki kærast til hægri fyrisitingarligan myndugleika.