Víkingur skal vinna – men tað verður ikki lætt

Víkingur skal í kvøld klokkan 19 spæla móti meistarunum av Gibraltar, Lincoln Red Imps F.C, í 1. undanumfarinum í Champions League. Ein dystur, sum verður spældur í Klaksvík og stroymdur á heimasíðuni hjá Kringvarpinum. Víkingur er favorittur at vinna samanlagt, men tað merkir ikki at tað verður uttan mótstøðu.

- Hetta er eitt lið, sum vit meta at vit hava ein kjans ímóti, men teir hugsa nokk tað sama, sigur Jóhan Petur Poulsen, venjari hjá Víkingi.

Hann vísur á, at hetta er eitt felag við nógvum royndum í Evropa og talan er um fleiri royndar spælarar. Hartil hevur Lincoln Red Imps F.C keypt fleiri spælarar undan uppgerðini móti Víkingi. Fyri heimaliðið sita Bergur Gregersen og Rani Hansen uttanfyri við skaða. Annars eru allir mans klárir.

Lincoln Red Imps F.C er stóra felagið á Gibraltar

Fótbóltur á Gibraltar er í framgongd og hevur tikið nøkur stór fet, eftir at landið fekk limaskap í UEFA. Fótbóltssambandið gjørdi eina nýggja deild í 2019 við meistarabólki. Ongin vinnari var í 2019 orsaka av korona-farsóttini.

Síðani hevur Lincoln Red Imps F.C. vunnið landskappingina – Gibraltar Football League – fimm ferðir upp í slag. Samanlagt hevur felagið vunnið landskappingina 29 ferðir. Sermerkt við sigursrøðini er, at Lincoln Red Imps F.C. vann meistaraheitið 14 ferðir upp í slag frá 2003 til 2016.

Lincoln Red Imps F.C. er fyrsta felagið, sum hevur umboðað Gibraltar í Champions League. Tað var í 2014  og mótstøðuliðið var HB. Táverandi føroysku meistararnir vunnu samanlagt 6-3. Teir spældu 1-1 á Gibraltar og vunnu 5-2 á Tórsvølli. Málskjúttarnir vóru Levi Hanssen (3), Tróndur Jensen, Jóan Símun Edmundsson og Fróði Benjaminsen.

Í 2021 megnaði Lincoln Red Imps F.C at vinna seg í bólkaspælið í UEFA Conference League við sigri á lettiska Riga FC. Størsta einstaka bragdi í Evropa var í 2016, tá Lincoln Red Imps F.C vann 1-0 á skotska stórfelagnum Celtic. Liðið tapti tó returdystin 3-0.

Harðastu kappingarneytarnir í heimligu kappingini hava verið feløgini Europa og St Joseph’s. B36 hevur tvær ferðir vunnið á St Joseph’s. Fyrru ferð eftir brotssparkskapping í 2018, og ein 2-1 sigur í koronatíðini, tá ongin returdystur var.

Í 2022 spældi júst Víkingur móti Europa FC. Víkingur vann báðar dystirnar. 1-0 á heimavølli og 2-1 á útivølli. Annars hevur føroyska landsliðið fyri kortum vunnið 2-1 á Gibraltar. Tá vóru seks spælarar frá Lincoln Red Imps F.C. við.

Kringvarpið vísur dystin á stroymingini á heimasíðuni.