Fakfelagssamstarvið: Ikki neyðugt at gera nýggja pensjónslóg

Tað er óneyðugt at samtykkja nýggja pensjónslóg, tí vit hava longu eina lóg, sum heimilar at hækka pensjónsaldurin eitt hálvt ár fimta hvørt ár. Tað er nóg mikið, og tað eigur løgtingið at halda seg til.

Tað sigur Fakfelagssamsamstarvið í almennum skrivi í dag, nú tað frættist, at landsstýrið ætlar at leggja uppskot um at hækka pensjónaldurin framaftur í heyst.

Fakfelagssamstarvið sigur, at sambært galdandi lóg skal støðan á arbeiðsmarknaðinum eftirmetast fyri at staðfesta, um tað er ráðiligt at hækka pensjónsldurin.

Tingið sleppur sær undan

Men við nýggju lógini vil løgtingið sleppa sær undan at viðgera støðuna á arbeiðsmarknaðinum. Tað er at renna undan ábyrgd og krógva seg fyri veljaranum, sigur Fakfelagssamstarvið.

Verður pensjónsaldurin hækkaður, noyðast fleiri at gevast í arbeiðslívinum, tí arbeiðsførleikin er viknaður av arbeiðsávum ella strongd, siga feløgini í fakfelagssamstarvinum.

Tey eru Starvsfelagið, Føroya Lærarafelag, Føroya Pedagogfelag, Akademikarafelag Føroya, Heilsuhjálparafelag Føroya, Havnar Arbeiðskvinnufelag og Felagið Føroyskir Sjúkrarøktarfrøðingar.

Les skrivið frá Fakfelagssamstarvinum her.