Royna at sannføra Trump um ikki at gera avtalu við Putin

Týski samveldiskanslarin, Friedrich Merz, hevur boðað evropeisku stjórnarleiðarunum á skundfund ídag fyri at umrøða komandi toppfundin millum Trump og Putin.

Við á fundinum, sum verður hildin talgildur, verður eisini amerikanski forsetin, Donald Trump.

Sambært altjóða tíðindastovum fara evropeisku leiðararnir at royna at sannføra amerikanska forsetan um ikki at gera nakra avtalu við Putin á fundinum fríggjadagin. 

Nógv lond í Evropa stúra fyri, at Trump kann fara at gera avtalu við Putin um at enda kríggið, uttan at taka Ukraina og restina av Evropa við uppá ráð.

Við á talgilda toppfundinum seinnapartin verður eisini ukrainski forsetin, Volodymyr Zelenskyj. 

Hittast í Anchorange

Amerikanska herstøðin, Joint Base Elmendorf-Richardson, verður karmur um toppfundin millum Donald Trump og Vladimir Putin fríggjadagin.

Herstøðin liggur í norðara parti av størsta býnum í Alaska, Anchorage. Tað verður, sambært CNN, mett at vera tryggasta staðið at halda toppfundin.

Roknað verður við, at Putin flýgur beinleiðis við flogfari úr Russlandi til Anchorage fyri at hitta Trump.