Avgjaldið á øli bæði hækkar og lækkar

Avgjaldið á øli skal hækka 50 prosent.

Men tey smáu bryggjaríini, tey, sum gera í mesta lagi fimm milliónir litrar um árið, fáa avgjaldslætta, sum er 40 prosent.

Tað ætlar landsstýrið.

Slík skipan verður brúkt í ES, har mikrobryggjarí fáa avgjaldslætta upp í 50 prosent, sigur Fíggjarmálaráðið.

Avgjøldini fyri øl, sum er millum 2,8 og 4,6 prosent, hækkar úr 7,60 upp í 11,40 fyri liturin av reinum alkoholi.

Øl millum 4,6 og 5,8 prosent fer úr 10,00 upp í 15,00 kr. fyri liturin av reinum alkoholi.

Og sterkasta ølið, tað, sum er 5,8 prosent ella meira, fer úr 180,00 upp í 270 krónur fyri liturin av reinum alkoholi.

Bæði dýrari og bíligari

Ein øl verður millum 2,00 og 2,50 krónur dýrari fyri hvørt blikk, 33 sentilitrar, í Rúsdrekkasøluni. 

Prísurin fyri samsvarandi øl frá smærri bryggjaríum fer sannlíkt at lækka millum 20 og 30 oyru fyri hvørt blikk.

Fíggjarmálaráðið metir, broytingin gevur landskassanum tvær milliónir krónur.

Lógarbroytingin skal koma í gildi 1. januar.