Revsitiltøk móti Russlandi kunnu fáa stórar avleiðingar fyri vinnulívið

Ætlanin hjá landsstýrinum um at herða revsitiltøkini móti Russlandi kann fáa stórar avleiðingar fyri føroyskt vinnulív. 

Tað metir stjórin samtakinum Varðanum, nú landsstýrið vil seta tvey russisk reiðarí á svartalista, hóast skipini hjá reiðarínum hava loyvi at fiska við Føroyar.

Makrelur og uppsjóvarvirki, Varðin Pelagic

Á Varðanum Pelagic á Tvøroyri.

Bogi Jacobsen stúrir fyri, at Russland kann svara aftur við at seta forðingar fyri føroyska útflutningin til Russlands:

Sambært Hagstovuni hava Føroyar útflutt fyri góðar 1,3 milliardir krónur til Russlands síðsta árið, tað vil siga til 1.juli í ár. Føroyar seldu makrel til Russlands fyri 864 milliónir og sild fyri 380 milliónir krónur síðsta árið.

Í 2021, árið fyri at Russland gjørdi innrás í Ukraina, útfluttu Føroyar fyri 2,3 miliardir krónur til Russlands.

Síðani kríggið brast á, er laksaútflutningurin til Russlands steðgaður, meðan útflutningurin av uppsjóvarfiski hevur tikið seg uppaftur.