Skattatrýst sigur ikki alt um vælferðina í landinum

Ikki ber til at siga bara við skattatrýstinum í huga, hvør vælferðin er í einum landi.

Tað sigur Nicolai Wammen, danskur fíggjarmálaráðharri, í svari til fíggjarnevndina hjá fólkatinginum.

Fíggjarnevndin spurdi, hvussu stóran tørv, Føroyar og Grønland hava fyri pengum úr Danmark, um skattatrýstið er tað sama í teimum báðum londunum, sum tað er í Danmark.

Í Danmark er skattatrýstið 44,9 prosent.

Tað er mett at vera 30 prosent í Grønlandi og 40,2 prosent í Føroyum, sigur fíggjarmálaráðharrin.

Skattatrýstið verður samanborið við bruttotjóðarframleiðsluna hjá landinum.

Tað sigur ikki endiliga, hvør vælferðin er í landinum.