Tonje Brenna skal leiða arbeiðaraflokkin í stórtinginum

Tonje Brenna verður nýggj forkvinna í tingbólkinum hjá norska arbeiðaraflokkinum.

Ein samd valnevnd hjá arbeiðaraflokkinum hevur skotið hana upp til at leiða flokkin í stórtinginum nýggja valskeiðið.

Norska TV 2 visti at siga í gjár, at Tonje Brenna, sum er næstforkvinna í arbeiðaraflokkinum, fór úr stjórnini fyri at taka við sum forkvinna í tingbólkinum hjá flokkinum í stórtinginum. Tonje Brenna var arbeiðs- og inkluderingarmálaráðharri.

Styrkja leiðsluna

Broytingin verður lýst sum eitt stig til at styrkja leiðsluna hjá arbeiðaraflokkinum í stórtinginum eftir valið seinasta mánadag, sum gav munandi fløktari reyð-grønan meiriluta enn áður, skrivar NRK.

- Nýggi politiski leiðarin fær ein sera týðandi leiklut í Arbeiðaraflokkinum. Talan er um eina nýggja politiska støðu í stórtinginum, sum krevur góða leiðslu og trygga stýring. Og hetta heldur valnevndin, at Tonje Brenna er rætta fólkið til, sigur floksskrivarin, Kari-Anne Opsal, við norska kringvarpið.

Einsamallur í stjórn

Stjórnin hevur sitið síðani oktobur í 2021. Miðflokkurin boðaði 30. januar frá, at hann tók seg úr stjórnni, og síðani 4. februar hevur Arbeiðaraflokkurin sitið einsamallur í stjórn.

Jonas Gahr Støre vann valið, sum var fyri viku síðani, og kann halda fram sum forsætisráðharri í Noregi. 

Arbeiðaraflokkurin hjá honum gjørdist størsti flokkur, og reyð-grøni vongurin fekk greiðan meiriluta við 87 tinglimum.

Arbeiðaraflokkurin er eisini eftir stórtingsvalið einsamallur í stjórn.