Ousmane Dembélé og Aitana Bonmatí vunnu Ballon d’Or

Tað var ein djúpt rørdu Ousmane Dembélé, sum í kvøld tók ímóti heiðrinum Ballon d'Or, sum tekin uppá, at hann var heimsins besti fótbóltsleikari seinasta kappingarár. 

28 ára gamli Dembélé vann á unga stórtalentinum úr Barcelona, 18 ára gamla Lamine Yamal, ið hinvegin vann heiðurin sum bestu ungi leikarin. 

Tárini feldi Paris Saint-Germain-stjørnan, tá hann takkaði familjuni, og serliga mammuni, fyri hennara stuðul. 

Ousmane Dembélé, Ballon d'Or

Mynd: Ritzau/Scanpix

Ballon d'Or-heiðurin hevði Demebéle væl og virðiliga uppiborið. Hann hevur í 2024-25 vunnið:

• Champions League
• Ligue 1 
• Fronsku steypakappingina
• Uefa Super Cup
• Franska stórsteypadystin

Og nú hevur hann eisini vunnið Ballon d'Or.  

Tað eru ítróttarjournalistar frá fronsku miðlunum L’Équipe og France Football, ið hava innstillað tilnevndu leikararnar til Ballon d'Or-heiðurin.

100 fjølmiðlafólk úr teimum 100 bestu fótbóltstjóðunum í heiminum har síðani atkvøtt um vinnaran. 

Topp 10 listin hjá monnum sá soleiðis út:

1. Ousmane Dembele
2. Lamine Yamal
3. Vitinha
4. Mohamed Salah
5. Raphinha
6. Achraf Hakimi
7. Kylian Mbappe
8. Cole Palmer
9. Gianluigi Donnarumma
10. Nuno Mendes

Aitana Bonmatí, Ballon d'Or

Mynd: Ritzau / Scanpix

Bonmatí trý ár á rað

Hjá kvinnunum vann spanska Aitana Bonmatí Ballon d'Or-heiðurin sum heimsins besti kvinnuligi fótbóltsleikari triðja árið á rað.

Tað hava einans Lionel Messi og Michel Platini gjørt henni eftir. 

Aitana Bonmatí, ið spælir við FC Barcelona, er eisini krumtøppurin á spanska landsliðnum, og hon var við, tá Spania vant burtur úr Føroyum í EM-undankappingini í 2021. 

Fyrri dysturin í Føroyum endaði 0-10 til Spania, meðan dysturin í Spania gjørdist uppaftur verri fyri føroysku leikararnar, ið tá taptu 12-0. 

Kanska ikki so undarligt, tí á spanska liðnum var, umframt Aitana Bonmatí, eisini Alexia Putellas, sum vann Ballon d'Or í 2021 og 2022. 

Ballon d'Or

Mynd: Ritzau / Scanpix

Allir vinnarar av heiðurslønum í sambandi við Ballon d'Or-handanina. 

• Bestu ungu leikararnir (Kopa-heiðurin): Vicky Lopez & Lamine Yamal
• Bestu venjarar (Johan Cruyff-heiðurin): Sarina Wiegman & Luis Enrique
• Bestu málverjan (Yashin-heiðurin): Hannah Hampton & Gianluigi Donnarumma
• Bestu málskjúttar (Gerd Muller-heiðurin): Ewa Pajor & Viktor Gyokeres
• Besta kvinnuliðið: Arsenal
• Besta mansliðið: Paris Saint-Germain
• Socrates-heiðurin: Xana Foundation
• Ballon d’Or kvinnur: Aitana Bonmati
• Ballon d’Or menn: Ousmane Dembele