Kanna huglag og atburð í barnafótbólti

Hvussu hevur tú upplivað stemningin og atferðina á síðulinjuni til barnafótbóltskappingar í ár?

Tað vilja tey í Fótbóltssambandinum vita, og tí hava tey gjørt eitt spurnarblað til foreldur, venjarar, hjálparvenjarar og onnur vaksin.

Spurnarblaðið er ætlað teimum, sum hava verið partur av barnakappingunum hjá U7 til U11 í 2025.

- Sum heild er hýrurin góður til hesar barnakappingarnar, og tey flestu vísa góðan atburð. Men vit vita um hesi einstøku dømini, tá foreldur ella venjarar blíva í so spent, ella ikki eru heilt samd í tí, sum gongur fyri seg á vøllinum, og tað kann hava stóra ávirkan á børnini, sigur Elin Sofía á Tjaldrafløtti Vestergaard frá Fótbóltssambandinum.

Higartil hava útvið 300 fólk svarað spurnarblaðnum, og uttan at hava nærlisið øll spurnarbløðini er longu greitt, at tey flestu uppliva ein góðan og positivan stemning á síðulinjuni, tá barnafótbóltskappingar eru.