Norski oljugrunnurin meira enn 1.000 milliardir í avlopi

Oljugrunnurin hjá norska statinum hevði 1.032 milliardir norskar krónur í avlopi í triðja ársfjórðingi í ár. Tað eru 662 milliardir danskar krónur.

- Úrslitið kemur av stórum avlopi á partabrævamarknaðinum, serliga innan tilfar, fjarskifti og í fíggjargeiranum, sigur Trond Grande, varaleiðari í Norges Bank Investment Management, í tíðindaskrivi.

Virðið á grunninum vaks 854 milliardir norskar krónur ( t.e. 547 mia. í donskum krónum) í triðja ársfjórðingi í ár, og roknskaparliga avlopið er 1.032 milliardir norskar ( t.e. 662 mia. danskar krónur).

Virðið í grunninum var 30. september í ár 20.440 milliardir norskar krónur. Tað eru 13.112 mia. danskar krónur.