Egingjaldið kann nú býtast í 12 partar

Í staðin fyri at skula gjalda næstan alt í einum, kann egingjaldið fyri heilivág nú býtast í 12 partar um árið.

Tað sigur nýggj skipan, sum kom í gildi 1. november.

Skipanin merkir, at fólk kunnu gera avtalu við Apoteksverkið um at rinda ein tólvtapart av egingjaldinum mánaðarliga, í staðin fyri at rinda alt ella stóran part av egingjaldinum í einum, tá heilivágur verður útflýggjaður.

230 kr. um mánaðin

Tey, sum eru millum 18 ár og pensjónsaldur, rinda upp til 2.756 kr. í egingjaldi um árið. Mánaðarliga gjaldið verður tí 230 kr. 

Pensjónistar og fyritíðarpensjónistar rinda upp til 1.862 kr. um árið, svarandi til 155 kr. um mánaðin. Hetta er egingjaldið nú í 2025.

Tey, sum eru í skipanini, skulu einki egingjald rinda, tá heilivágur verður útflýggjaður. 

Tey rinda í staðin fyri mánaðarligt gjald.