Føroyskir og grønlendskir fólkatingslimir skulu ikki fáa farloyvi við løn

Flokkurin Danmarksdemokratarnir fer at koma við uppskoti um, at fólkatingslimir úr Grønlandi og Føroyum, sum eisini eru í landstinginum ella løgtinginum, eiga ikki at fáa farloyvi við løn úr fólkatinginum fyri at vera í landstinginum ella løgtinginum.

Tey eiga ikki at fáa dupulta løn, heldur flokkurin.

Karina Adsbøl, sum er í formansskapinum í fólkatinginum fyri Danmarksdemokratarnar, sigur, sambært Ritzau, tað ikki vera rætt at brúka skattapeningin soleiðis.

SF tekur undir við Danmarksdemokratunum.

Karina Adsbøll

Karina Adsbøll. (Mynd: Ritzau Scanpix)

Lógarbroyting á veg

Ritzau skrivar, at í Føroyum er lógarbroyting á veg, sum fer at gera, at eftir næsta løgtingsval fer ikki at bera til at fáa farloyvi við løn frá løgtinginum fyri at vera í fólkatinginum.

Í Grønlandi letur landstingið ikki fólki, sum fer í fólkatingið, farloyvi við løn.

Aki-Matilda Høegh-Dam, sum er vald í fólkatingið, er í farloyvi haðani, og fær eisini løn úr fólkatinginum.

Hon er í landstinginum. Elvira Kûitse er í fólkatinginum fyri Aki-Matilda Høegh-Dam.