Tiltøk móti útlendskum skipum skulu í sjófeingislógina

Tiltøk móti fremmandum skipum skulu nú fáa heimild í sjófeingislógini.

Í uppskoti um broytingar í lógini, stendur millum annað, at brúk er fyri at víðka ásetingina, so heimild er at banna førum undir fremmandum flaggi at taka móti vørum og tænastuveitingum, sum stuðla  fiskiskapi, sum tað stendur. 

Brúk er eisini fyri nýggjari áseting, sum forðar fyri, at før undir fremmandum flaggi, sum fiska av hóttum fiskastovnum í ósamsvari við samtyktir, sum Føroyar hava tikið undir við, fáa atgongd til føroyskan sjógv og føroyskar havnir.

Í uppskotinum um broytingar í sjófeingislógini eru átta broytingar.

Millum annað heldur Fiskivinnu- og Samferðslumálaráðið, at ikki er neyðugt at koma í løgtingið við frágreiðing um fiskivinnuna hvørt ár.

Hon skal koma annaðhvørt ár.

Landingar uttanlands

Eisini skal lógin geva greiðari heimild til fiskiskap á Føroya banka. 

Vinnan skal kunna flyta ella avhenda felagskvotur ella felags fiskidagar uttan fyri føroyskan sjógv.

Ásetingin um at blaka veiðu út skal umorðast, so hon er neyvari og greiðari og umfatar allan fiskiskap.

Og loyvi til at geva undantak til bráðfeingis loyvi til landingar uttanlands skal í lógina.