USA og Sýria hava lopið á IS

Amerikanskar og sameindar sýriskar herdeildir hava lopið á tað, sum tær lýsa sum 15 vápnagoymslur,ið víðgongdi islamistiski yvirgangsbólkurin, IS, í syðra parti av Sýria eigur.

Sambært amerikansku miðfyrisitingini vórðu IS-málini í Rif Damashq-landslutinum álopin millum 24. og 27. november, bæði á landi og úr luftini.

- Álopini oyðiløgdu meira enn 130 granatir og rakettir, nógvar sjálvvirkandi riflur, maskinbyrsur, landminur og tilfar til at gera heimagjørt spreingievni, stendur í fráboðan frá Centcom, sum er amerikanska miðfyrisitingin.

USA hevur framvegis herdeildir í Sýria, har tær samstarva við demokratisku deildirnar í Sýria (SDF), sum í høvuðsheitum eru mannaðar við hermonnum úr kurdiska YPG-heimaherinum.