Súsanna aftur í tingið - Djóni heldur fram sum landsstýrismaður

Súsanna Berthholdsen verður kortini ikki landsstýriskvinna í barna- og útbúgvingarmálum, men fer aftur í løgtingið, og Djóni Nolsøe Joensen heldur fram sum landsstýrismaður í barna- og útbúgvingarmálum.

Tað er støðan fyri tingfundin, sum byrjar um ein lítlan tíma, har m.a. fosturtøkulógin kemur til atkvøðugreiðslu.

Djóni Nolsøe Joensen

Djóni Nolsøe Joensen heldur fram sum landsstýrismaður í barna- og útbúgvingarmálum.

Løgmansskrivstovan upplýsir í tíðindaskrivi, at Súsanna Bertholdsen hevur biðið løgmann um at verða loyst úr starvi, sbr. stýrisskipanarlógini § 29, stk. 1.

Løgmaður hevur loyst landsstýriskvinnuna úr starvi.

Løgmaður hevur samstundis gjørt av at endurtilnevna Djóna Nolsøe Joensen, tingmann fyri Javnaðarflokkin, sum landsstýrismann í barna- og útbúgvingarmálum.