Mjällby vil rinda sjey milliónir fyri Áka

Føroyski U21-landsliðsspælarin, Áki Debes Samuelsen, er í løtuni til læknaroynd hjá svensku meistarunum, Mjällby. Nettavisen skrivar, at prísurin fyri 21 ára gamla føroyingin er um sjey milliónir krónur, ella 11 milliónir norskar krónur.

Áki Samuelsen bleiv seldur til norska Ranheim frá HB í fjør. Prísurin tá var um 450 túsund krónur, umframt at HB skuldi fáa tíggju prosent av eini víðari sølu. Passar prísurin, sum Nettavisen skrivar, so fær HB áleiði 700 túsund krónur afturat. Hetta merkir samstundis at virðið á Áka Samuelsen er meiria enn tíggjufalda síðani skifti til OBOS-liguna í Norra.

- Nú veit eg bara tað, sum miðlarnir skriva, men tað kann undra meg, at ein spælari kann fara so langt upp í virði upp á eitt ár. Eg havi sagt tað fyrr, og kann gott siga tað, eg haldi at føroysk feløg duga ov illa at seta prís á sínar spælarar, sigur Ransin N. Djurhuus, formaður í HB.

Hann gleðist um, at ein spælari hjá HB er komin víðari í altjóða fótbólti, men heldur eisini at tíðin er komin til at endurskoða hvussu føroyskir spælarar verða virðismettir. Hann vísur eisini á, at Wisla Plock skal hava fingið eitt boð upp á 22 milliónir krónur fyri 25 ára gamla føroyska landsliðsmiðverjan, Andrias Edmundsson.

Mjällby vann púra óvæntað svenska meistaraheitið í farna kappingarári. Liðið skal nú luttaka í Champions League og kemur sannlíkt í eitt evropiskt deildarspæl til komandi kappingarár. Nettavisen skrivar, at Áki Debes Samuelsen í løtuni er til læknaroynd, og at skiftið væntast at verða kunngjørt ein av komandi døgunum.