Bakkafrost í Skotlandi: Sjúka kostaði 60 milliónir í fjórða ársfjórðingi

Fiskasjúkan pasteurella hevur verið dýr fyri Bakkafrost.

Seinasta ársfjórðingin í 2025 hevði Bakkafrost 60 milliónir krónur í meirútreiðslum í Skotland, tí óvanliga nógv smolt og laksur doyðu. Ein av høvuðsorsøkunum til, at nógvur laksur er deyður, er sjúkan pasteurella. 

Tað hevur Bakkafrost boðað keypsskálanum í Oslo frá.

Í fráboðanini stendur, at fyribilstølini fyri fjórða ársfjórðing vísa, at 58 milliónir krónur av meirútreiðslunum stava frá, at óvanliga nógvur laksur doyði í alibrúkinum í Portree, og tvær milliónir krónur frá, at nógv smolt doyði í Couldoran í Skotlandi.

Bakkafrost hevur havt stór hall í Skotlandi í fleiri ár, og seinasta summar gjørdi alifyritøkan av at leggja smoltalingin í Skotlandi saman við teirri føroysku so hon er undir føroyska leiðslu.

- Tað er neyðugt at gera nakað nú, so at tað kann ganga skjótari at fáa alingina í Skotlandi at ganga betur, segði Regin Jacobsen, stjóri í Bakkafrosti, við útvarpið í august í fjør.

Regin Jacobsen

Regin Jakobsen. 

Partabrævið fallið

Partabrævið hjá Bakkafrosti fall nakað, eftir at fráboðanin um meirkostnaðin í Skotlandi kom fyrradagin. Mánadagin var partabrævið 510 norskar krónur, men tá ið marknaðurin læt aftur í gjár, var tað fallið niður í 493 norskar krónur. 

Síðsta árið er partabrævið hjá Bakkafrosti fallið úr 612 norskum krónum niður í 493 norskar krónur. Í juli var tað tó enn lægri. Tá tað var lægst, var tað 393 norskar krónur.

Bakkfrost kunnger ársúrslitiå fyri 2025 tann 9. februar.