Føroyska kvinnan arbeiddi saman við samsekum

Føroyska kvinnan, sum var dømd fýra og eitt hálvt ára fongsulsrevsing í býarrættinum í Keypmannahavn fyri grovt og skipað telefonsvik, arbeiddi saman við øðrum samsekum.

Tað kom fram í rættinum.

Talan er um Honnu Christinu Gærdum Matras úr Klaksvík, sum í gjár var funnin sek í øllum seks ákærunum í málinum. 

Sambært dóminum hevur hon svikað fleiri offur fyri umleið 10 milliónir krónur, og harumframt hevur hon roynt at fremja svik fyri upp ímóti 37 milliónum krónum aftrat.

Ákærin segði í rættinum í gjár, at alt er gjørt í samspæli við samsekar brotsmenn, sum í sær sjálvum kemur undir skerpandi umstøður.

Aðrar skerpandi umstøður vóru, at hon misnýtti tað álit, ið hon hevði sum sjúkrarøktarfrøðingur, og fór eftir eldri fólkum, sum høvdu tørv á hennara umsorgan.

- Hon misnýtir sín myndugleika og síni evni til at manipulera tey eldru, segði ákærin í rættinum. 

Bakmaður varðhaldsfongslaður "in absentia"

Ein bakmaður, sum TV2 avdúkaði í sendingini "Den falske politikommissær," er eisini skuldsettur fyri at hava framt svik í teimum fimm viðurskiftunum, sum føroyski sjúkrarøktarfrøðingurin bleiv dømd fyri. 

Talan er um ein 27 ára gamlan dansk-turkara; hann er varðhaldsfongslaður "in absentia", tí hann er staddur uttanlands. Sambært TV2 er hann staddur í Turkalandi.

Ákærin viðurkendi í rættinum, at tann dømda ikki er bakmaður í netverkinum. 

Hanna Christina Gærdum Matras skeyt alt fyri eitt dómin inn fyri landsrættin.