Fekk gásarhold longu áðrenn dystin

Hetta var ein dagur og ein dystur, sum Rói E. á Skipagøtu neyvan gloymir í bræði.

Í einum hádramatiskum dysti, sum hevði alt, ein góður dystur skal hava, fekk bakspælarin sínar fyrstu minuttir í einum EM-endaspæli.

 - Fantastiskt, staðfesti hann eftir dystin.

 - Longu áðrenn dystin fekk man gásarhold av at hoyra, hvussu nógv tað larmaði í høllini. At man so kundi koma inn á vøllin at gera mun var so gott, sum tað kundi blíva.

Elias Ellefsen á Skipagøtu, sum var ivasamur við akslaskaða, byrjaði inni fyri Føroyar, men hann fekk hjálp frá millum annað beiggjanum, sum avlastaði onkra løtu, meðan Pauli Mittún tók onkra aðra løtu.

Tað gekk yvirhøvur væl, og Føroyar fóru til hálvleiks frammanfyri við tveimum.

Fyrstu løtuna í seinna hálvleiki, struku Føroyar undan, og eitt skifti vóru seks mál á muni. Sveis kom kortini sterkt aftur, meðan føroyingarnir vórðu ørkymlaðir - ikki minst inn á turkiska dómaraparið, sum tók nakrar ivasamar avgerðir.

Men tá tað sá út til at Sveis skuldi fara avstað við øllum, bjargaði Pauli Jacobsen, áðrenn Vilhelm Poulsen kundi javna. Sveis kastaði bóltin í tóma málið, men tíðin var farin, og so endaði javnt.

 - Vit vóru sjálvandi sjúkliga glaðir eftir dystin, tí vit høvdu fingið eitt stig, tá tað sá út til, at vit fóru at tapa. Men nú, nakrar fáar minuttir aftaná hugsar man: "Shit, hetta kundi faktiskt havt verið eitt sindur betri, um man kundi havt vunnið, segði Rói E. á Skipagøtu, sum eisini skeyt sítt fyrsta EM-mál eftir flotta piruettu.

Sunnudagin spæla Føroyar ímóti Montenegro, sum tapti tepurt fyri Slovenia í dag.