Føroyar eru úti av EM-endaspælinum eftir tap móti Slovenia

Føroyar máttu hava stig fyri at koma víðari til miðumfarið í EM-endaspælinum, tí Montenegro hevði onkursvegna latið - ja, latið - Sveis vinna við júst so nógvum málum, 16, sum Føroyar vóru frammanfyri Sveis, áðrenn síðsta umfarið í bólkinum. 

Luktar tað? Ja, rættiliga illa - antin av svartfjallatimburmonnum ella onkur meira luskutum. 

Í grundini er tað ikki rættiliga svínsku slovenarnir, ið mann er mest óður inn á beint nú, men inn á hasar svartfjallabúgvarnir, sum vóru so botnvánaligir. 

Svartfjallabúgvar untu ikki føroyingum at stríðast eitt sindur fyri okkum, at vit høvdu møguleikan at spæla okkum víðari. 

Tað ætli eg mær ikki at gloyma teir fyri. 

EM26, Oslo, Føroyar, Slovenia, Óli Mittún

Høvdu møguleikan

Føroysku leikararnir fingu møguleikan at vinna dystin, tá teir komu flúgvandi út til seinna hálvleik og løgdu seg framum við tveimum málum.

Men orka tóktist ikki ordiliga at vera har í kvøld, tí tú sat ongantíð við einari kenslu av, at vit vóru ordiliga omaná. 

Givið er, at vit hava ikki somu breiddina sum størri hondbóltstjóði, og tí spæla Føroyar spalt. Tað vil siga, at vit brúka teir somu spælararnar nógv. 

Tað sást nokk eisini í dystinum, tí føroysku leikararnir tóktust eitt sindur tungir.

Tí var eisini gott at síggja Allan Norðberg sleppa á vøllin og skora nøkur mál. Og at Tórður Guttesen, ið hevur spælt sera lítið, eisini fekk víst hvørjar knotur eru í honum, tá hann bjargaði einum brotskasti.

EM26, Oslo, Føroyar, Slovenia, Óli Mittún

Mynd: JN.fo

Hinvegin so blivur føroyingar eisini avbardir av nøkrum sera stórum og svínskum slovenum. 

Reyða kortið var einaferð á loftið, men spurningur er, um tað ikki átti at verið blátt. 

Vunnu aftur EM

Tá tað er sagt, so skuldu Føroyar havt bundið um sekkin, tá Sveis var í honum í fyrsta dystinum. 

So hóast vir eru hørm, so kunnu leikarar iðra seg um møguleika, ið teir ikki tóku av. 

Kenslan, ið føroyingar fara úr Oslo við, er, at vit enn einaferð vunnu EM-endaspælið - á áskoðararplássunum og í grundini eisini á vøllinum við sera vøkrum hondbóltsspæli.  

EM26, Oslo, Føroyar, Slovenia, Fjepparar

Mynd: Kolektiff

Vakrir dagar í Oslo

Føroyingar kunnu gleðast um nakrar vakrar dagar í Oslo, bæði á og uttanfyri vøllin. 

Hesi ungu leikararnir koma aftur - størri og sterkari. 

Og lítið er at ivast í, at føroysku fjeppararnir vera har aftur at stuðla teir so fyrimyndarliga. 

Takk fyri dreingir! Takk fyri føroyingar. 

EM26, Oslo, Føroyar, Slovenia

Slovenia - Føroyar 30 - 27 (16 -15)

Elias Ellefsen á Skipagøtu 9
Óli Mittún 8
Hákun West av Teigum 4
Leivur Mortensen 2
Vilhelm Poulsen 2
Teis Horn Rasmussen 2
Allan Norðberg 1