Føroyski fyrimunurin burtur - skulu hava stig ímóti Slovenia

Føroyar skal hava stig ímóti Slovenia, um tað skal eydnast at koma í miðumfarið í Malmø.

Tað er greitt eftir at Sveis smurdi Montenegro av við ikki færri enn 17 málum. Tískil er 16 máls fyrimunurin hjá Føroyum undan dystinum seinnapartinum burtur.

Tey, sum vónaðu, at Montenegro fór at spæla fyri æruni, vórðu vónbrotin, tí tíðliga var greitt, at Sveis fór at vinna. 

Munurin var seks í steðginum, men eftir montenegrinska marrubyrjan í seinna hálvleiki vaks munurin skjótt, og endin var, at Sveis vann heili 43-26.

Dysturin hjá Føroyum ímóti Slovenia byrjar klokkan 19.30. Kringvarpið byrjar at senda klokkan 19.00.