Mark Rutte: Nato-londini skulu økja trygdina í Arktis

Aðalskrivarin í Nato, Mark Rutte, hevur nú viðmerkt nakrar smálutir um skitsuna fyri eini avtalu um Grønland, sum hann tosaði við Donald Trump, forseta, um í gjár.

Mark Rutte, sum er á toppfundinum í World Economic Forum í Davos í Sveis, sigur, at avtalan ber í sær, at Nato-londini skulu økja trygdina í Arktis, og at úrslitini av herdu trygdini har skulu vera sjónlig longu í ár, skrivar Reuters.

Sambært tíðindastovuni,  er Rutte vísur í, at sameindu londini, sum ikki eru landafrøðiliga staðsett í Arktis, eisini fara at taka undir við hesum.

Rutte sigur, at á fundinum millum hann og Trump bleiv ikki tosað um mineral í undirgrundini í Grønlandi. Nato-aðalskrivarin sigur eisini, at ítøkiligar samráðingar millum USA, Danmark og Grønland halda fram.