Tvífaldi føroyski flúgvarin næstbesta málið í bólkaspælinum

Føroyar skutu eitt ótal av góðum málum ímóti Sveis, Montenegro og Slovenia í Unity-leikhøllini í Oslo.

Tíverri rukku tey ikki til miðumfarið í Malmø, men um ikki annað er eitt av teimum valt til topp-fimm listan hjá EHF fyri bestu málini í EM-bólkaspælinum.

Tvífaldi flúgvarin hjá Føroyum í fyrsta dystinum ímóti Sveis er nevniliga næstbesta EM-málið í bólkaspælinum. 

Bert hálvurfimti minuttur var eftir av dystinum, og støðan var javnleikur 26-26, tá Elias Ellefsen á Skipagøtu, Hákun West av Teigum og Óli Mittún funnu upp á ráð.

Spælskiparin lyfti til vongin, og so var Óli Mittún til reiðar mitt fyri, meðan sveisiska verjan stóð sum kánus og hugdi at. Serliga gott er málið við avgerandi støðuni í dystinum í huga. 

Endin var, at Sveis fekk yvirhálað aftur, áðrenn Vilhelm Poulsen javnaði í evstu løtu.