Føroyingar brúktu 22 milliónir í lummapeningi í Oslo

22 milliónir krónur. 

Umleið so nógv kann roknast við, at føroysku áskoðararnir, sum fylgdu við manslandsliðnum í hondbólti í Oslo til EM-kappingina har, hava brúkt í lummapengum.

Í øllum førum, um vit hyggja at kortgjaldingum við føroyskum kortum.

Tá føroyska manslandsliðið í hondbólti var í Berlin, vóru eisini nógvir fjepparar við, og tá vísti metingin, at føroyingar í alt brúktu 13 milliónir krónur í lummapeningi. Tað vil siga, at upphæddin hesa ferð er 9-10 milliónir krónur størri.

Føroya Banki hevur aftur hesa ferð hugt at, hvussu nógv føroysk kort vórðu brúkt frá 15. januar til 23. januar. Tølini vísa, at gott og væl 1.900 viðskiftafólk hjá bankanum vóru í Noregi hesar dagarnar, og tey brúktu kortini umleið 40.000 ferðir. Og samlaða upphæddin var 9,3 milliónir krónur.

Tað gevur eina miðalnýtslu, sum liggur uppá slakar 5.000 krónur pr. viðskiftafólk. Í Berlin í 2024 var miðalnýtslan 3.600 krónur.

Føroya Banki, Trygd, Skyn

Frítekst tagging: 

Føroya Banki

Trygd

Skyn

Bjarni Árting Rubeksen

500 fólk fleiri í Noregi enn í Berlin

Tølini hjá Føroya Banka siga, at hesaferð vóru 500 av teirra viðskiftafólkum fleiri í Oslo enn tað vóru í Berlin, og øll viðskiftafólkini brúktu kortið tvífalt so ofta, sum tey sum gjørdu í Berlin. Ta ferðina vóru slakar 20.000 transaktiónir, hesaferð var talið 40.000 transaktiónir. Í Berlin var samlaða upphæddin hjá viðskiftafólkunum hjá Føroya Banka umleið 5 milliónir, hesaferð var upphæddin 9,3 milliónir krónur.

Sjálvt um vit ikki heilt neyvt vita, hvussu nógvir føroyskir áskoðararar vóru í Noregi, so var talið rættiliga fitt størri enn tað var í Berlin, og tað gevur munurin millum tølini hjá Føroya Banka í 2024 og 2026 eisini týðiliga ábending um.

EM-hondbóltur í Oslo 2026

22 milliónir eru ein meting

Samlaða talið uppá 22 milliónir krónur er ein meting og tí ikki eitt neyvt tal. Metingin byggir á talið hjá Føroya Banka, og er faldað við einum lutfalstali, sum vit hava roknað okkum fram til. 

Lutfallið hjá Føroya Banka er funnið við at samanrokna innlánini, útlánini, fíggjarstøðurnar og eginognina í teimum fýra peningastovnunum, og so finna eitt miðaltal, sum upphæddin hjá Føroya Banka er faldað við. Og úrslitið av teirri útrokningini gevur stórt sæð sama lutfall, sum var brúkt í 2024.

Tað bar ikki Kringvarpinum til at fáa tøl frá hinum føroysku peningastovnunum.

(Dagført 28. januar 2026: Greinin er broytt og metingin - ella gitingin - um hvussu nógv er brúkt umborð á Norrønu, er tikin úr. Orsøkin er, at tey, sum ferðaðust við Norrønu, heilt vist eisini hava brúkt pening í landi í Oslo, og tí er tað í besta føri eitt git, hvussu nógv er brúkt umborð á Norrønu./ST)