G! festivalurin: Frá frekum bretskum poppi til skitið føroyskt rapp

G! festivalurin hevði ikki verið G! festivalurin uttan kant og fjølbroytni, og fýra tey fyrstu nøvnini, ið festivalurin kunngerð í 2026, hava og eru júst tað.

Tey eru fjølbroytt og hava kant og spenna víða, tí har er alt frá orkumiklum og hjartanemandi bretskum poppi til heiðurslønt føroyskt lagsmíð og rátt rapp, skrivar G! festivalurin í tíðindaskrivi. 

Hesi fýra nøvnini leggjast aftur at eitt nú Frændur, Fantastic Negrito (US), Tunghoyrt og Irah (UK), ið longu eru kunngjørd. 

LYNKS (UK)

Lynks úr Onglandi kemur við búnum og skortum, og vit sleppa at uppliva nakað sum ferðast millum framførslulist og popp, skrivar G! í tíðindaskrivi. 

Tónleikurin er fangandi poppur við punkuttum kanti, og tekstirnir, ið snúgva seg um at vera ungur og queer, eru bæði erligir og skemtiligir.

Konsertirnar eru frískligar og orkumiklar við stevjøvnum dansi í ovurmát.

JERUB (UK)

Aftur í ár borðreiður G! festivalurin við einum lovandi stjørnuskoti úr Onglandi. Í fjør var Lewis Fitzgerald, ið hevði eina góða og sjarmerandi framførslu á Sandinum, og fyrraárið var tað Jamie Grey. 

Jerub er føddur í Nigera og uppvaksin í Nottingham.

Hann hevur longu tíggjutals milliónir av stroymingum, og hevur framført beinleiðis í sjónvarpi hjá BBC.

Í november 2025 gav Jerub út sína fyrstu heildarútgávu, "The Wonder Years".

Løgini eru fangandi og tekstirnir sera kenslubornir, men fram um alt, so hevur Jerub eina heilt sermerkta sangrødd, skrivar G! festivalurin í tíðindaskrivi. 

GUÐRIÐ HANSDÓTTIR (FO)

Hin fólkakæra Guðrið Hansdóttir verður eitt av føroysku høvuðsnøvnunum á G! festivalinum.

Guðrið hevur, sum G! festivalurin eisini staðfestir í tíðindaskrivi, langt síðani sungið seg inn í okkara hjørtu við síni vøkru rødd og fleiri sterkum plátum.

Hin seinasta útgávan, "Gult myrkur", vann FMA fyri bestu útgávu og besta tekst í 2023.

Longu nú er Guðrið aftur ávegis við nýggjari útgávu, sum eitur "Sýrublað", har ferðin verður sett nakað upp.

LES EISINI: "Guðrið spælisjúk á nýggjari plátu"

Plátan er framleidd av Høgna Lisberg og hevur, sambært Guðrið sjálvari, ein frískligan, knasandi, grønan og til tíðir sýruttan tóna, sum heitið eisini ber brá av. Tekstirnir hevur Beinir Bergson skrivað.

Fyrsta staklagið, "Oyralippan", er júst útkomið, fleiri stakløg koma í næstum og øll útgávan verður tøk 10. apríl.

Bolstad (FO)

Bolstad gjørdi veruliga vart við seg, tá ið hann framførdi á Sement. Her var talan um ein rappara, har orðini flutu óvanliga væl, skrivar G! festivalurin í tíðindaskrivi.

Stílurin er skitin og ráur, og er als eingin roynd at tekkjast breiðu fjøldini við at gera tað popputt.

Bolstad

Orðini er samfelagsrevsandi, og hann ræðist ikki at taka upp evnir, sum vit ofta tega burtur í Føroyum.

Stílurin er av tí gamla skúlanum, men eingin hevur nakrantíð rappað sum Bolstad á hesum klettunum. 

G! festival logo, G! logo

Hvat: G! festivalurin
Hvar: Syðrugøtu
Nær: 16. - 18. juli

Higartil kunngjørd tónleikanøvn:
Frændur (FO) 
Fantastic Negrito (US)
Guðrið Hansdóttir (FO)
Irah (UK)
Jebra (UK)
Tunghoyrt (FO)
Lynks (UK)
Bolstad (FO)