Anni er millum bestu fríkavarar í ríkinum

Seks minuttir. 

So leingi klárar Anni Højgaard úr Runavík at vera undir vatni uttan at fara upp at anda. 

Anni Højgaard er útbúgvin sjúkrasystir og arbeiðir sum tað í Danmark, men størsta partin av tíðini livir hon sum ein toppatletur. Anni Højgaard hevur nevniliga eitt frítíðarítriv, sum krevur nógv av sær. Hon er fríkavari og venur og kappast bæði í svimjihyli og í sjónum. 

Tað longsta, hon hevur klárað at kava niður í sjógvin við einum andadrátti, eru 60 metrar.

Hóast tað bert eru fýra ár, síðani hon byrja at venja sum fríkavari, hevur hon longu luttikið í fleiri kappingum í Danmark, har hon hevur staðið seg sera væl og vunnið gull og silvur.

- Tá eg byrjaði, visti eg alt fyri eitt, at hetta var nakað, sum mær dámdi, og sum eg eisini kláraði meg væl í, tí fyrstu ferð kláraði eg lættliga at vera undir í tríggjar minuttir, áðrenn eg skuldi upp at anda aftur, sigur Anni Højgaard, sum umframt at brúka nógva tíð í svimjihyli eisini venur joga og andadráttsvenjingar.

At vera fríkavari krevur, at tú ert væl fyri og hevur virðing fyri møguligum vandastøðum, og tekur tú øll neyðug trygdaratlit, er fríkaving ein sunnur ítróttur, heldur Anni Højgaard.

- Eg plagdi at vera ein týpa, sum lættliga bleiv stressað og nervøs um ymiskt, men nú eri eg púra rólig og eri blivin mentalt sera væl fyri, sigur Anni Højgaard.

Í morgunsendingini greiðir Anni Højgaard frá serliga frítíðarítrivinum, hvussu hon venur, og hvat tað gevur sær at vera fríkavari.