Vilja hava fjølbroyttari bústaðarmøguleikar í Vestmanna

Kommunustýrið í Vestmanna hevur samtykt at bjóða eitt stykki út at byggja bústaðir á, so bústaðarmøguleikarnir í bygdini gerast fjølbroyttari.

Kommunan skrivar, at fleiri vilja hava bústað í Vestmanna, og at fólk javnan spyrja seg fyri um møguleikar at fáa fatur á bústaði. Tað eru bæði yngri og eldri fólk.

- Vit leggja sjálvandi nógv fyri, so tað letur seg gera at búseta seg her. Grundstykkir eru tøk, og fleiri hava eisini tikið av tí møguleikanum. Vit vita tó eisini, at tað eru fleiri, sum vilja hava fjølbroyttari bústaðarmøguleikar, og tað vilja vit í Vestmanna eisini kunna bjóða, skrivar kommunan á heimasíðuni.

Skulu hava fígging

Tey, sum bjóða, skulu koma við sínum uppskoti um, hvussu byggingin kann skipast, men kommunan setur sum krav, at tað verða bygdir bústaðir, sum til ber at fáa fígging til í Vestmanna.

Eisini skal hugsast um fólk við rørslutarni, sigur kommunan, sum eisini treytar sær, at burðardyggar orkuskipanir verða brúktar.

Økið, sum talan er um, er ein samanlegging av Kolastykkinum og økinum á Bakka, har sum Turkihúsið stóð, skrivar Vestmanna kommuna.