Kanada og Frakland lata sendistovu upp í Nuuk

Kanada og Frakland lata upp sendistovur í Nuuk í dag, skrivar AFP-tíðindastovan.

Til tess at vera meira til staðar í Arktis lata Kanada og Frakland upp sendistovur, skrivar franski miðilin, France24.

Men ein sendistova er eisini ein partur av tí at nærkast grønlendska fólkinum.

Tað segði franski forsetin, Emmanuel Macron, tá hann vitjaði í Grønlandi í fjør.

- Vit fara at lata eina sendistovu upp her í Nuuk, til tess at vera nærri tykkum og at standa undir liðini á tykkum, segði Macron tá.

Tá sendistovurnar lata upp í dag, vera millum onnur danski uttanríkisráðharrin, Lars Løkke Rasmussen, og kanadiski uttanríkisráðharrin, Anita Anand, hjástødd.