Alzheimersfelagið: Neyðugt at broyta tvingsilslógina

Tað var í 2020, at Løgtingið samtykti lógina um tvingsil. Endamálið við lógini er at gera tað truplari at brúka tvingsil og á tann hátt verja fólk, sum kunnu koma í ta støðu, at tey vera útsett fyri tvingsli á ein ella annan hátt.

Men sjálvt um Naina Túgvustein, forkvinna í Alzheimersfelagnum, er fegin um, at har er komin ein lóg á økinum, so eru hon og hini í Alzheimersfelagnum sannførd um, at tað hevði verið rætt at broytt lógina. Tí, sum lógin er orðað nú, setur hon forðingar fyri, at tað ber til at brúka til dømis peiliskipanir og ávaringarskipanir, gps-arar, rørsluvarnarar og fallvarnarar til fólk við Alzheimers. 

- Skipanin, sum hon er í dag er øgiliga umstendilig og tung at umsita, sigur forkvinnan í Alzheimersfelagnum.

Í Degi og Viku fríggjakvøldið kom fram, at føroyska fyritøkan Nemlia hevur ment tøkni, sum skal gera tað eitt sindur lættari at arbeiða í ellisrøktini, tó so at hon skal gera so lítið inntriv í lívið hjá brúkarunum sum gjørligt.

Og tað hetta innslagið - og samrøðan við Kára Davidsen, advokat, aftaná - sum hevur fingið forkvinnuna í Alzheimersfelagnum, at gera vart við støðuna.

- Fyri fólk við Alzheimers er tað ein avmarkning, at tey ikki kunnu brúka hesar skipanirnar, tí tað bindir tey meira inni enn neyðugt. Tí halda vit at tað hevði verið ein fyrimunur at rætta uppá hesi viðurskifti, sigur Naina Túgvustein, forkvinna í Alzheimersfelagnum.

Trýst á leinki niðanfyri og hoyr alla samrøðuna við Nainu Túgvustein um evnið.