Eingin lívstrygging um BMI er oman fyri 45

BMI einsamalt er ikki avgerandi fyri, um lívstrygging verður latin í Føroyum.

Men BMI er við í heildarmetingini um heilsuna hjá tí, sum vil hava lívstrygging.

Tað hevur Tilfeingis- og Vinnumálaráðið fingið at vita frá feløgunum, sum bjóða lívstryggingar.

Eirikur í Jákupsstovu, landsstýrismaður, hevur svarað spurningi frá Dennisi Holm, løgtingsmanni, um BMI og lívstrygging.

Dennis Holm sigur, at nógvir føroyingar fáa ikki lívstrygging, tí teir hava ov stórt BMI. 

Eirikur í Jákupsstovu sigur tó, at dømi eru um, at fólk, sum hava BMI oman fyri 45, fáa ikki lívstrygging.

Hann sigur, at hann fer at eggja tryggingarfeløgunum til ikki at nokta at geva lívstrygging orsakað av einstakari upplýsing, í hesum føri BMI.

66 prosent av fólkinum í Føroya hava BMI, sum er 25 ella størri.

Fólk, sum hava BMI yvir 25, viga ov nógv.