Trump: Iran skal geva seg yvir treytaleyst

- Iran skal geva seg yvir treytaleyst.

Tað skrivar amerikanski forsetin, Donald Trump, á sosiala miðli sínum, Truth Social.

Hann sigur, at eingin avtala verður gjørd við Iran, uttan so at landið gevur seg yvir treytaleyst.

Tá landið hevur givið seg yvir, skulu veljast ein ella fleiri nýggir leiðarar, og so fara USA og sameindu londini at arbeiða "ótroyttiliga" fyri at gera Iran "great again," sum Trump tekur til á Truth Social. 

Hækkar støðugt

Kríggið í Miðeystri hevur við sær, at oljuprísurin hækkar støðugt. 

Í dag er prísurin 89 dollarar fyri tunnuna, og hann er hækkaður 25 prosent, síðani Ísrael og USA lupu á Iran leygardagin. 

Beint eftir álopið var prísurin 80 dollarar fyri tunnuna.