Hagstovan: Talið á fosturtøkum minkar

kvinnur, sum eru skrásettar at búgva í Føroyum, framdu 33 fosturtøkur í fjør.

Tað vísir ein uppgerð, sum Hagstovan hevur almannakunngjørt.

Og tað merkir, at talið á fosturtøkum er minkað munandi, bæði um samanborið verður við 2024 og við 2023.

Í 2024 framdu kvinnur, sum eru skrásettar at búgva í Føroyum, 43 fosturtøkur, og tað vil siga, at tað í fjør vóru tíggju fosturtøkur færri enn árið fyri.

Samanbera vit við 2023, so var talið av fosturtøkum tá 42, og tí vóru tað níggju fosturtøkur færri í fjør enn í fyrraárið.

Talið av fosturtøkum í fjør nærkast nú talinum av fosturtøkum, sum var í tíðarskeiðinum frá 2013 til 2022. Tá sveiggjaði tað ímillum 19 og 32 fosturtøkur. Í 2010 og 2011 vóru eisini 33 fosturtøkur.

51,4 fosturtøkur

Tá gjørt verður upp fyri hvørji 1.000 livandi fødd, so var talið av fosturtøkum í fjør 51,4 og tað er munandi minni enn 2023 og 2024, tá tað var ávikavist 73,2 og 73,4.

Flestu fosturtøkurnar, í øllum førum eftir uppteljingini hjá Hagstovuni, sum gongur aftur til 1994, vóru í 1995, tá tær vóru 60 í tali, og í 1998, tá tær vóru 59 í tali.

Gjørt upp fyri hvørji 1.000 livandi fødd, var talið av fosturtøkum í 1995 og 1998 ávikavist 91,6 og 94,4.

Fáar fosturtøkur sammett við grannalondini

Samanborið við hini Norðurlondini liggja Føroyar lágt, tá tað snýr seg um fosturtøkur. Vit hava ikki nýggj tøl fyri grannalondini, men í tølum fyri 2019 lá Svøríki hægst við umleið 320 fosturtøkum fyri hvørji 1.000 livandi fødd børn. Danmark, Ísland og Noreg lógu millum 220 og 250, og lægst lá Finnland, sum lá niðan fyri 200.

Grønland er ikki við í tí uppgerðini, men har veit landslæknaembætið at siga, at tað vóru 1.034 fosturtøkur í 2023 og 926  í 2024. Hetta eru størstu tølini í Norðurlondum, og sambært landslæknaembætinum í Grønlandi ivaleyst eisini í øllum heiminum.