Fólkatingsvalið: Javnaðarflokkurin fær 40 prosent av atkvøðunum

Veljarakanning, sum Spyr.fo hevur gjørt fyri Portalin og FM1, vísir, at 40 prosent av teimum spurdu, ætla at atkvøða fyri Javnaðarflokkinum á fólkatingsvalinum í morgin.

Framgongdin er næstan 12 prosentstig, samanborið við seinasta fólkatingsval.

Hóast afturgongd, stendur Sambandsflokkurin at fáa hin fólkatingssessin.

Sambandsflokkurin fær í kanninginin 24,5 prosent, og tað eru 5,7 prosentstig minni enn á seinasta fólkatingsvali.

Sostatt bendir alt á, at Sjúrður Skaale í Javnaðarflokkinum og Anna Falkenberg í Sambandsflokkinum verða vald aftur í fólkatingið.

Kanningin vísir, at Tjóðveldi fær 17,3 prosent av atkvøðunum og Fólkaflokkurin 16 prosent.

Heilt aftur til 1953

Portalurin skrivar, at  vit skulu heilt aftur til 1953, at flokkar hava fingið meira enn 40 prosent av atkvøðunum.

Tá stillaðu tríggir flokkar upp til fólkatingsval.

Sambandsflokkurin fekk 45 prosent av atkvøðunum og Johan Poulsen valdan.

Petur Dam var valdur fyri Javnaðarflokkin, sum fekk 44,6 prosent av atkvøðunum.