Hálvt ár at fáa olju- og gassveitingina í rættlag

Amerikanska og ísraelska álopskríggið móti Iran hevur elvt til álvarsligastu orkukreppuna higartil, sambært leiðaranum á altjóða orkustovninum, IEA.

Hóast fíggindaskapurin endar nú, ganga í minsta lagi seks mánaðir, áðrenn olju- og gassveitingin úr Flógvaríkjunum kemur í rættlag, sigur stjórin í IEA, Fatih Birol, við Financial Times.

- Fólk skilja, at hetta er ein stór avbjóðing, men eg eri ikki vísur í, at fólk skilja vavið og avleiðingarnar av hesi støðu til fulnar, sigur hann.

Birol lýsir støðuna sum "størstu alheimshóttanina móti orkutrygdini í søguni" og vísir á, at umleið ein fimtingur av heimsins olju og gassi undan krígnum varð skipað um Hormuzsundið.

Sundið er stongt

Sum aftursvar til amerikonsku og ísraelsku álopini hevur Iran stongt sundið, og landið hevur eisini lopið á oljuskipanir í øðrum londum í økinum, tí tey hava stuðlað amerikanska krígnum.

Sambært Birol eru nógvar olju- og gasskeldur nú annaðhvørt skaddar ella óvirknar orsakað av hesum álopum, og tað fer at ganga rúm tíð, áðrenn tær kunnu latast uppaftur.

- Olju- og gassprísirnir eru hækkaðir nógv orsakað av krígnum, og teir fara  helst at hækka uppaftur meira, um ikki kríggið endar og Hormuzsundið verður latið uppaftur, sigur stjórin í altjóða orkustovninum IEA, Fatih Birol, við Financial Times.