Danskir hermenn høvdu spreingievni við sær til Grønlands

Danskir hermenn høvdu spreingievni við sær til Grønlands í januar, tá grønlandskreppan var í hæddini.

Spreingievnini skuldu brúkast til at oyðileggja flogbreytirnar í Nuuk og Kangerlussuaq, soleiðis at amerikonsk hernaðarflogfør ikki kundu seta seg í Grønlandi, um Donald Trump, forseti, gjørdi álvara av at taka Grønland við valdi.

Við sær til Grønlands høvdu danir eisini blóð frá donskum blóðbankum, soleiðis at tey særdu kundu fáa viðgerð, um bardagi tók seg upp.

Tað skrivar DR, sum seinasta árið hevur tosað við 12 týdningarmiklar keldur í donsku stjórnini, herleiðarar og embætisfólk á høgum stigi, og keldur í frægnatænastum í Danmark, Frankaríki og Týsklandi.

Samanumtikið siga keldurnar, at síðsta árið kann ikki samanberast við onnur ár, og fólk hava ligið í andvekri í nógvar nætur.

Hava framvegis týðandi leiklut

Keldurnar hava havt - og hava framvegis - týðandi leiklut í altjóða kreppuni, sum er sprottin burtur úr kravinum hjá USA um at fáa Grønland.

Keldurnar eru dulnevndar, tí tær meta, at støðan við Grønlandi framvegis er spent og viðkvom.

Eingin av keldunum hevur upplýsingar um ítøkiligar amerikanskar álopsætlanir móti Grønlandi.

Kortini stúrdu fleiri av teimum í januar fyru, at USA fór at leypa á Grønland hvørja løtu.