Fyritøkur vilja hava størri gjøgnumskygni í kommunal útboð og innkeyp

Reglur eiga at gerast um kommunal útboð og innkeyp.

Kappingareftirlitið mælir til at gera lóg um økið, og verandi reglur hjá almennu stovnunum skulu dagførast.

Tað er niðurstøðan hjá Kappingareftirlitinum, sum gjørdi spurnarkanning um kommunal útboð og innkeyp.

Størri gjøgnumskygni

Stívliga triðja hvør fyritøka, sum hevur verið við í kommunalum útboði og innkeypi, sigur seg hava verið fyri órættvísi.

Spurt var, um fyritøkurnar meta, at staðseting í kommununi, sum bjóðar út, kennskapur við fólk í kommununi, sum bjóðar út, ella óreiðiligar gerðir, so sum svik og mutur, hava týdning fyri, hvør vinnur útboð og innkeyp.

Fyritøkurnar, sum eru við í kanningini, vilja hava størri gjøgnumskygni og greiðari tilgongd. 

Ynskja felags útboðsportal

Nevnt verður, at ein felags útboðsportalur fyri land og kommunu hevði gjørt gjøgnumskygnið størri og gjørt tað lættari at geva boð. 

Eisini verður nevnt, at fyritøkurnar vilja hava betri eftirlit við, at reglurnar verða hildnar, og amboð at handhevja reglurnar. 

Útboðstilfarið skal eisini hava greiðan leist, so vánaligt útboðstilfar ikki er orsøk til, at skeivur veitari vinnur.

Kappingareftirlitið fer at spyrja landsstýrismannin í vinnumálum, hvat vinnan ítøkiliga vil.

Bjarni Dal-Christiansen er búskaparfrøðingur hjá Kappingareftirlitinum.