Bill McLeod Jacobsen fingið starv í norskum fótbólti

Fyrrverandi føroyski U21-landsliðsvenjarin, Bill McLeod Jacobsen, hevur fingið nýtt starv.

Sogndal hevur sett 52 ára gamla klaksvíkingin sum venjaramennara í menningardeildini hjá felagnum. Har skal hann arbeiða tætt saman við venjarunum í felagnum, og hjálpa til við at menna bæði teir og umhvørvið rundan um fótbóltin í Sogndal.

– Eg skal arbeiða tætt saman við venjarunum, menna teir og hjálpa teimum at fáa tað besta fram í gerandisdegnum á vøllinum. Samstundis snýr hetta seg um at menna felagið og umhvørvið rundan um fótbóltin her í Sogndal, sigur Bill McLeod Jacobsen við heimasíðuna hjá felagnum.

Starvssetanin verður av Sogndal lýst sum eitt týdningarmikið stig fyri at tryggja víðari menning av akademinum.

Bill McLeod Jacobsen hevur UEFA Pro-venjaraloyvi, og hevur arbeitt við fótbólti í meira enn 35 ár, millum annað sum U21-landsliðsvenjari frá 2007 til 2016.

Eftir nógv ár í føroyskum fótbólti, hevur hann nú valt at royna seg uttanlands, og skal eftir ætlan vera í Noregi í hálvtannað ár - í fyrstu atløgu.

– Sogndal er eitt felag við greiðum málum og sterkari mentan fyri menning. Hetta verður ein spennandi møguleiki at royna meg í einum nýggjum umhvørvi og brúka tær royndirnar, sum eg havi savnað gjøgnum nógv ár, sigur hann.

Hann heldur eisini, at føroyskir venjarar hava nógv at bjóða uttanlands, og eiga ikki at smæðast burtur frá slíkum avbjóðingum.

Hoyr innslag í tíðindunum her: