Landsverk: 300 milliónir um árið til vegir, tunlar og viðlíkahald

300 milliónir krónur um árið.

Tað er árligi løgukarmurin, sum Landsverk hevur brúk fyri um árið bara til landsvegakervið næstu árini, um tunnilsætlanirnar hjá Løgtinginum skjulu fremjast, og neyðuga viðlíkahaldið eisini skal gerast.

Upphæddin er nærum ein tvífalding av upphæddini, sum í meðal er brúkt upp á landsvegakervið seinastu tíggju árini - tann upphæddin er 155 milliónir krónur - men tá verður hond samstundis tikin um risastóra viðlíkahaldseftirsleipið, ið hevur hópað seg upp gjøgnum áratíggju.

Marjun Weihe Thomassen, Landsverk

Nýggj frágreiðing

Tørvurin er lýstur í einari spildurnýggjari frágreiðing, sum Landsverk hevur skrivað, og sum er latin Jacobi Vestergaard, landsstýrismanni í vinnumálum, ið varðar av Landsverki. 

Við í karminum hjá Landsverki eru 200 milliónir krónur um árið næstu fýra árini, sum skulu markast til at taka toppin av ógvusliga viðlíkahaldseftirsleipinum.

Seinastu tølini fyri eftirsleipið siga, at tað er uppá tilsamans 375 milliónir krónur, men Marjun Weihe Thomassen, stjóri í Landsverki, segði við útvarpið í gjár, at tað talið er frá einari umleið 10 ára gamlari uppgerð, og er nógv størri nú.

Í nýggju frágreiðingini verður skotið upp, at ein verklagslóg verður gjørd fyri tær 200 milliónir krónurnar, sum skulu markast til viðlíkahaldið  næstu fýra árini, og frameftir skal viðlíkahald roknast við, tá nýggjar íløgur verða gjørdar í vegir og tunlar.