Fáa minni prís fyri tosk á Føroyabanka enn á landgrunninum

Størsti toskurin av Føroyabanka verður í dag seldur fyri 30 krónur fyri kilo. Prísurin er umleið 10 krónur minni enn fyri størsta toskin av landgrunninum. 

- Toskurin á Føroyabanka er sera rak hesa árstíðina, og tí vilja keypararnir ikki geva nógv fyri hann, sigur Høgni Hansen, stjóri á Fiskamarknaðinum.

Høgni Hansen, Fiskamarknaðurin

Fyrrapartin landaði útróðrarbáturin Steymsund, sum er ein av smærru línubátinum í bólki-4, tosk av Føroyabanka í Havn.

Nærum øll veiðan, góð 21 tons, er toskur-1, tað vil siga størsti toskurin á Føroyabanka.

Bankatoskur, toskur av Føroyabanka

Tilsamans 265 fiskidagar eru á Føroyabanka í ár. Stóru línuskipini í bólki-3 hava 40 fiskidagar, útróðrarbátar í bólki-4 hava 135 fiskidagar, og smáu útróðrarbátarnir í bólki-5 hava 90 dagar. 

Sambært Fiskamarknaðinum eru góð 100 tons fiskað á Føroyabanka higartil í ár.

Hoyr innslag í útvarpstíðindunum: