Fer at hava jaligt samstarv við nýggju stjórnina

- Vit fara at samstarva jaligt við nýggju donsku stjórnina.

Tað sigur Anna Falkenberg, fólkatingskvinna fyri Sambandsflokkin, í sambandi við, at nýggj stjórn er skipað í Danmark. 

Hon vísir á, at fleiri ynski frá Sambandsflokkinum á fólkatingi eru komin við í samgonguskjalið. 

Eitt nú at danska stjórnin fer at arbeiða fyri føroyskum limaskapi í Altjóða Olympisku Nevndini, tryggja betri rættindi til føroysk lesandi í Danmark, og at avgerðir um Føroyar skulu takast í Føroyum. 

Anna Falkenberg og Mette Frederiksen

Eisini stendur í samgonguskjalinum, at danska stjórnin er sinnað at kanna møguleikan fyri ríkisláni til Suðuroyartunnilin. 

Fólkatingsumboð hjá Sambandsflokkinum sita vanliga í tingbólkinum hjá Vinstraflokkinum, sum ikki er í stjórnini. Hetta hevur tó ikki verið ein forðing í samráðingunum, sigur Anna Falkenberg. 

Hoyr innslag í útvarpstíðindunum:

Sjúrður Skaale

Eisini fólkatingsmaðurin fyri Javnaðarflokkin, Sjúrður Skaale, fegnast um, at føroysku ynskini eru gingin á møti í samgonguskjalinum, millum annað, at:
 
Stjórnin fer at stuðla Føroyum í at fáa betri atgongd til ES marknaðin, at hon er opin fyri at veita ríkislán til ein møguligan Suðuroyartunnil, og at hon vil arbeiða fyri, at føroyskar fyritøkur fáa ágóðan av verjuíløgum í Norðatlantshavi.

Og at stjórnin er sinnað, at knýta ein nýggjan samskiftiskaðal í føroyska fjarskiftisundirstøðukervið, so hann eitt nú kann brúkast av Føroya Tele.

Tað sigur Javnaðarflokkurin á fólkatingi í tíðindaskrivi.

.