FSF og MMR fara undir skúlafótbólt í Føroyum

- Endamálið við avtaluni er, at fótbóltur skal gerast atkomuligur fyri øll skúlabørn og styrkja trivnað, rørslu og felagsskap, siga Høgni Wardum, fultrúði í Mentamálaráðinum og Christina Ravnsfjall, grassrootssamskipari í  Fótbóltssamband Føroya.

Hoyr samrøðuna við Høgna Wardum og Christinu Ravnsfjall í Summarmorgni.

Sagt verður í tíðindaskrivi, at partarnir eru samdir um, at fótbóltur og rørsla hava ein týðandi leiklut í menningini hjá børnum – bæði kropsliga, sosialt og mentalt. Gjøgnum kropsligt virksemi kunnu børn menna lívsførleikar, styrkja síni sambond og fáa gleði av at vera virkin.

“Við hesum átaki vilja vit styrkja ítróttarliga virksemi í skúlunum og skapa fleiri møguleikar fyri børn og ung at røra seg í gerandisdegnum. Fótbóltur kann vera eitt týdningarmikið amboð til bæði trivnað og læring,” sigur Bárður á Lakjuni, landsstýrismaður.

Átakið merkir, at skúlar fáa møguleika at seta í verk fótbóltstilboð – bæði í skúlatíð og uttanfyri vanliga undirvísing. FSF fer í hesum sambandi at veita undirvísingartilfar, stuðla við útgerð og bjóða servitan og vitjanir til skúlar kring landið.

“Vit eru sera fegin um samstarvið við MMR. Skúlafótbóltur er ein týðandi liður í at røkka fleiri børnum og geva teimum gleðina við fótbólti. Samstundis styrkir tað felagsskapin og leggur eitt gott grundarlag fyri bæði breiddini og framtíðar menning av fótbólti í Føroyum,” sigur Kristin Dam Ziska, aðalskrivari.

Skúlafótbóltur kann verða partur av námsætlanini, til dømis í ítrótti, og kann eisini skipast sum virksemi uttanfyri undirvísingina – alt eftir tørvi og ynski hjá einstaka skúlanum.

Við hesum samstarvi vilja MMR og FSF skapa betri karmar fyri rørslu og felagsskapi og geva fleiri børnum møguleika at verða virkin í einum jaligum og fevnandi umhvørvi.