Framvegis ongar samráðingar millum Heilsuhjálparafelagið og KAF

Eingin samráðingarfundur er avtalaður millum Kommunala arbeiðsgevarafelagið og Heilsuhjálparafelagið. 

Tað váttar Mary Antonsdóttir, forkvinna.

Hon hevur tó fyri viku síðani biðið Aksel V. Johannesen, landsstýrismann í fíggjarmálum, um fund, men hevur einki frætt aftur.

- Eg vil vita nærri, hvat liggur í neyðtilbúgving í sambandi við verkfall, og hvussu verður við lyftum í samgonguskjalinum um møguleikan at stytta arbeiðsvikuna, sigur Mary Antonsdóttir. 

Fóru frá samráðingarborðinum

Forkvinnan í heilsuhjálparafelagnum og formaðurin í kommunala arbeiðsgevarafelagnum fóru fyri skjótt tveimum vikum síðani frá samráðingarborðinum uttan avtalu.

Ósemja er um felags lønarkarmin, sum er avtala millum 12 fakfeløg og Fíggjarmálaráðið um 3,87 prosent lønarvøkstur frá 1. okt í fjør til 30 september í ár.

Heilsuhjálparafelagið er ikki við í avtaluni um felags lønarkarm.