Ógreitt hvør skal bera kostnaðin fyri burturbeining av elbilum

Higartil eru færri enn 10 elbilar latnir inn til burturbeiningar. 

Kommunala brennistøðin, sum tekur elbilar úr øllum landinum, hevur fýra battarí og fýra elbilar í varðveitslu, til greiða er fingin á, hvør skal bera kostnaðin. 

Til dømis, hvussu stórur parturin skal vera hjá bileigaranum.

Tvey battarí frá bilasølum eru send av landinum til viðgerðar.

Tað sigur Eyðdis Hartmann Niclasen, landsstýriskvinna, í svari til Steffan Klein Poulsen, løgtingsmann.

Landsstýriskvinnan sigur, at enn er ikki greitt, hvussu ábyrgdin og kostnaðurin av at beina burtur elbilar skal býtast.

Heilsu- og Orkumálaráðið arbeiðir við spurninginum. 

Sambært meting hjá Stena Recycling kostar tað 20.400 kr. at handfara battarí úr elbili. Hevur battaríið skaða, kostar tað 71.200 kr.