Norski oljugrunnurin farin upp um 15.000 milliardir

Tann sonevndi norski oljugrunnurin er nú komin upp um 15.000 milliardir krónur í okkara pengum. Tað eru 22.683 milliardir norskar krónur.

Fyrra hálvár í ár gav 1.197 milliardir í avlopi, og tað er tað størsta avlopið, sum hevur verið í einum hálvári, síðani grunnurin byrjaði í 1996, sigur Norges Bank Investment Management, sum umsitur grunnin.

Stóra avlopið stavar í høvuðsheitum frá asiatiskum tøknipartabrøvum.

Norska Stórtingið samtykti í 1990 lógina um at stovna grunnin, og fyrstu pengarnir vórðu settir inn í 1996.

Endamálið við oljugrunninum er at tryggja eina langtíðar fyrisiting av inntøkunum frá norska olju- og gasstilfeinginum, so bæði verandi og komandi ættarlið fáa ágóðan av teimum. Almenna navnið hjá grunninum er Statens pensjonsfond utland.