Greining: Føroyar kunnu standa seg uppaftur betur í úrvalsítrótti

Føroyar standa seg væl í altjóða úrvalsítrótti.

Nýggj greining, sum Idrættens Analyseinstitut, Idan, hevur gjørt fyri Ítróttasamband Føroya, vísir, at føroyskir úrvalsíðkarar standa seg betur, enn væntast kann av eini smátjóð.

Sterkur felagsskapur, sjálvboðið arbeiði, eldhugi og eftirlagingarføri hava verið avgerandi fyri føroysku úrslitini. Frágreiðingin vísir samstundis, at úrvalsskipanin framvegis er ung og nýggj og hevur fleiri menningarøki, skrivar Ítróttasamband Føroya.

LES FRÁGREIÐINGINA: Elite Sport in the Faroe Island

Greið tilmæli

Í fleiri sersambondum er fyrisitingarliga orkan lítil, og í fleiri ítróttagreinum er heimliga venjingar- og kappingarumhvørvið ov lítið til at menna bestu íðkararnar upp á hægsta altjóða stig.

Fráfall í tannárunum er eisini ein avbjóðing, serliga hjá gentum og ungum kvinnum. Idan kemur tí við fleiri tilmælum til føroyskar ítróttamyndugleikar.

Mælt verður millum annað til, at hækka og tryggjað fíggingina til úrvalsítrótt, stovna føroyska úrvalsmiðstøð, styrkja leiðslu, fyrisiting og venjaramenning og minka um fráfallið og raðfesta kvinnuítróttin.

Harumframt verður gransking, altjóða samstarv og IOC-góðkenning nevnd.

 - Frágreiðingin gevur ÍSF, Úrvali og sersambondunum eitt sterkt vitanargrundarlag at byggja víðari á. Næsta stigið er at gera tilmælini til ítøkilig átøk, sum kunnu gera framgongdina støðugari og meira haldføra, skrivar ÍSF.